بقلم : يونس نصيري
باين أن معركة تنظيم كأس العالم 2030 فالمغرب ما غاديش تتحسم غير فالتيرانات ولكن حتى داخل القوانين. من قلب كلية الحقوق السويسي، خرج وزير العدل عبد اللطيف وهبي بتصريحات فتحت نقاش كبير على واش الترسانة القانونية الحالية قادرة تواكب حدث عالمي بهاد الحجم.
وهبي طرح تساؤلات مباشرة على التناقض اللي ممكن يكون بين القوانين المغربية وطبيعة الانفتاح الدولي اللي كيتطلبو المونديال، خصوصًا مع قدوم جماهير من ثقافات مختلفة
ومن بين الأمثلة اللي عطى وقف عند واحد النقطة اللي دارت نقاش وقال: واش غادي نطلبو من الزوار عقد الزواج فالفنادق؟ وكيفاش غادي نتعاملو مع حالات بحال ديال النجم البرتغالي كريستيانو رونالدو اللي عندو أبناء بلا عقد زواج؟
“واش غادي نطلبو منو يدلي بعقد الزواج؟ ومنين غادي يجيبو؟”
كما تطرق الوزير حتى لمسألة تطبيق بعض القوانين المرتبطة بالسلوك العام بحال استهلاك الكحول فالشارع وقال "غادي تقول لواحد ألماني ولا بريطاني مخصكش تكون سكران فالشارع… هادو راه ماشي ديما فايقين، واش غادي تطبق عليه القانون الجنائي وانت كتوجد لكأس العالم؟ خاصك تحسم فهاد المسألة”
وفالأخير كان واضح فالموقف ديالو وقال:
“إلى بغيتي تجيب كأس العالم خاصك تجيب كلشي لي معاه… مبغتيش، ما تديروش وهنينا” مؤكدًا أن المغرب اختار يتحمل المسؤولية الدولية وهاد الشي كيتطلب قرارات واضحة باش ينجح هاد الحدث الكبير.
أضف تعليقك
من شروط النشر : عدم الإساءة للكاتب أو للأشخاص أو للمقدسات أو مهاجمة الأديان أو الذات الإلهية، والابتعاد عن التحريض العنصري والشتائم.
تعليقات
0